Archidiaconus Vallis Renaudi in ecclesia Matisconensi, subdelegatus a religioso viro et venerabili abbate Sancti Benigni Divionensis, Lingonensis dyocesis, conservatore seu defensore a Sede Apostolica deputato religiosis viris abbati et conventui Cluniacensibus ac personis et membris eis subjectis, venerabili viro et discreto abbati de Riomo et dilectis in Christo Sancti Pauli, Sancti Martini Mauziacensis, de Marsic (?), de Riomo, Sancti Genesii de Volvic, Sane Culture, de Tylide, de Gomeas (?) et de Monistrel cappellanis vel eorum vicariis, salutem et mandatis nostris immo potius apostolicis humiliter obedire, mandatum apostolicum predictum abbatem Sancti Benigni recepisse noveritis sub hac forma: Clemens episcopus, servus servorum Dei, dilecto filio abbati Sancti Benigni Divionensis, Lugdunensis dyocesis, salutem et apostolicam benedictionem. Pium esse dinoscitur ut gloriantibus in malicia per nos taliter resistatur, quod repressis eorum insultibus, vacantes divino cultui liberius possint in observantia mandatorum Domini delectari. Cum itaque dilecti filii, abbas et conventus monasterii Cluniacensis, sicut ex parte ipsorum fuit propositum coram nobis, ac eciam abbates, priores, conventus et monachi monasteriorum, prioratuum et membrorum Cluniacensis ordinis eidem Cluniacensi monasterio subjectorum, a nonnullis qui nomen Domini in vacuum recipere non formidant, super bonis suis multipliciter molestentur, nos volentes eorumdem abbatum, priorum, conventuum et monachorum providere quieti et molestatorum ipsorum maliciis obviare, discretioni tue per apostolica scripta mandamus, quatinus predictis abbatibus, prioribus, conventibus, et monachis contra predonum, raptorum et invasorum audaciam per te vel per alium aut alios oportuni favoris assistens presidio, non permittas eos in personis vel super monasteriis, prioratibus, membris, domibus et aliis bonis suis a talibus molestari, molestatores hujusmodi per censuram ecclesiasticam, appellatione postposita, compescendo, attencius provisurus, et cetera; quod si secundo, et cetera; contra hujusmodi ergo mandatum nostrum, et cetera. Non obstante, et cetera. Datum, et cetera ... (sic). Predicti vero abbatis Sancti Benigni mandatum nos similiter recepisse noveritis sub hac forma: Abbas Sancti Benigni, etc ... verum quando corde reddimur solliciti, ut cum devocione superiorum mandatis exequendis diligenter prebeamus operam efficacem, ne notemur de negligentia vel contemptu et nobis constet tam per privilegia Sedis Apostolice, quam per alia sufficiencia munimenta, monasterium Mauziacense, dyocesis Claromontensis, fore subjectum religiosis viris abbati et conventui Cluniacensibus et monasterio ipsi ac in potestate et ordinacione existere eorumdem, id eciam apud nos pro notorio habeatur, cum nemo nisi calumpniose subjectionem hujusmodi valeat diffiteri, cumque venerabilis pater dominus Yvo, abbas Cluniacensis, nobis presente, accesserit ad monasterium Mauziaci supradictum causa visitacionis, correctionis ut pater abbas et sui officii exercendi, prout tam ipse quam sui predecessores facere consuevere hactenus temporibus retroactis, Hugo de Porta, Petrus de Serpano, Bernardus de Vilars, dominus Rodulfus de Rupe, milites, Philippus de Serpano, Johannes de Serpano, Guillelmus de Sancto Germano filius Chatardi, domini de Crusiaco, necnon Petrus Gaudemar, Guillelmus filius Stephanus de Beofort, Bernardus Ebrardi, Ayguinotus Ebrardi et Guionetus Ebrardi fratres, Johannes de la Valete, et Gulferius fratres, Johannes dictus Chassagne, Cortais donatus monasterii Mauziaci, Stephanus filius domine de la Porte, Guillelmus et Robinus de Monte Rugoso fratres, Aymo de Valeriis, Philippus de Colere, domicelli, Aulanyer presbyter, Johannes Balbot presbiter, Johannes Acherie clericus, magister Hugo Daurat, Ebrardus archipresbiter Claromontensis, magister Acharies Claromontis, Durandus de Calvis, clerici, ut predones et invasores juris monasterii Cluniacensis memorato abbati Cluniacensi, venienti die jovis ante Assumptionem beate Marie, ad monasterium Mauziaci supradictum et volenti ibidem ingredi ut suum officium exerceret, se irreverenter opposuerunt, et Petro abbati Mauziaci rebellanti et inobedienti dicto domino abbati Cluniacensi et claudenti vel claudi facienti januas monasterii sui ne ingrederetur inibi, prestiterunt consilium et juvamen tanquam sue salutis immemores et culpas aliquas facere proprias cupientes ipsos; ne multis cranantibus locus sit exemplo et fiant qui nequam fuerunt nequiores, quos canonice monuimus desistere a predictis, monitis nostris factis per nos personaliter apud ipsos et locum Mauziaci supradictum non adquiescentes, in scriptis ob causam hujusmodi excommunicamus et excommunicationis vinculo innodamus, vobis mandantes in virtute obediencie et sub pena excommunicationis precipientes, quam in vos ferimus exnunc et in scriptis, si mandatum nostrum presens nolueritis adimplere, quatinus predictos omnes publice diebus tam dominicis et festivis quam profestis excommunicatos denuncietis, significantes parrochianis vestris et etiam injungentes ne aliquis loquendo, comedendo, orando seu qualicumque [modo] dictis excommunicatis participare presumat, alioquin contra ipsos participantes ad excommunicacionis sentenciam procedemus, tamdiuque mandatum nostrum presens exequamini, quousque predicti protervi et contumaces mereantur a nobis beneficium absolucionis obtinere. Reddite litteras presentes sigillis vestris appositis in signum mandati nostri exequendi. Datum die veneris ante Assumptionem beate Marie, anno Domini M^o CC^o sexagesimo sexto.